ek dam dil mein utar jae jo KHanjar aap ka

ek dam dil meñ utar jaa.e jo ḳhanjar aap kā

'farhat-ehsās' apnā ban jaa.e qalandar aap kā

ho ke chaknā-chūr phir pur-nūr honā hai mujhe

kab mire shīshe se Takrā.egā patthar aap kā

raqs merā jism chāhe jis tasavvur meñ kare

raqs ke pesh-e-nazar rahtā hai mehvar aap kā

saḳht hairat meñ paḌe haiñ shahr bhar ke ahl-e-vasl

raat bhar ḳhālī paḌā rahtā hai bistar aap kā

bhiiḌ meñ se sar uThā kar is qadar mat dekhiye

bhiiḌ varna kaaT kar le jā.egī sar aap kā

aap to bas ek shab āġhosh meñ aa jā.iye

sub.h hone tak nikal jā.egā sab Dar aap kā

mujh ko apnī ek qatra hukmrānī chāhiye

aur is ke baa'd phir saarā samundar aap kā

bechtā hai thok meñ tanqīd kā bāzār use

'farhat-ehsās' apne she'roñ meñ hai phuTkar aap kā

ek dam dil mein utar jae jo KHanjar aap ka

'farhat-ehsas' apna ban jae qalandar aap ka

ho ke chakna-chur phir pur-nur hona hai mujhe

kab mere shishe se Takraega patthar aap ka

raqs mera jism chahe jis tasawwur mein kare

raqs ke pesh-e-nazar rahta hai mehwar aap ka

saKHt hairat mein paDe hain shahr bhar ke ahl-e-wasl

raat bhar KHali paDa rahta hai bistar aap ka

bhiD mein se sar uTha kar is qadar mat dekhiye

bhiD warna kaT kar le jaegi sar aap ka

aap to bas ek shab aaghosh mein aa jaiye

subh hone tak nikal jaega sab Dar aap ka

mujh ko apni ek qatra hukmrani chahiye

aur is ke ba'd phir sara samundar aap ka

bechta hai thok mein tanqid ka bazar use

'farhat-ehsas' apne she'ron mein hai phuTkar aap ka