ایک گردان شب و روز وہ گردانتے ہیں

ایک گردان شب و روز وہ گردانتے ہیں

کیا حقیقت ہے پس پردہ نہیں جانتے ہیں

زندگی ہم ترے دھوکے میں نہیں آئیں گے

زندگی ہم ترے بہروپ کو پہچانتے ہیں

کوئی دن اور کہ چمکیں گے ستارہ بن کر

خاک الفاظ کے صحرا کی ابھی چھانتے ہیں

پھر ہوا چاہے جہاں ان کو اڑا لے جائے

بے خبر رخ جو ہوا کا نہیں پہچانتے ہیں

اونچی دستار سے دھوکے میں نہ آ جائیں آپ

یہ فقیہان حرم ہیں انہیں ہم جانتے ہیں

بارہا ان سے کہا تھا نہ تماشا کیجے

حجتی لوگ مگر بات کہاں مانتے ہیں