ek haalat jo tazabzub ki bani rahti hai

ek hālat jo tazabzub kī banī rahtī hai

apne saa.e se bhī har vaqt Thanī rahtī hai

ab to jo boltā huuñ pahle hī likh letā huuñ

koī talvār mire sar pe tanī rahtī hai

mutma.in huuñ maiñ kisī zaḳhmī parinde kī tarah

jāgte sote dil-o-jāñ pe banī rahtī hai

is liye jaltā badan le ke chalā aatā huuñ

tirī palkoñ ke tale chhāoñ ghanī rahtī hai

intizār us kā ḳhayāl us kā tamanna us kī

jo ḳhayāloñ meñ kahīñ gul-badanī rahtī hai

ab yaqīnī hai nazariye kā tahaffuz yaaro

sar pe talvār to gardan pe anī rahtī hai

bārhā chhūT gayā dāman-e-shīrīñ 'balrāj'

mirī taqdīr meñ bas tesha-zanī rahtī hai

ek haalat jo tazabzub ki bani rahti hai

apne sae se bhi har waqt Thani rahti hai

ab to jo bolta hun pahle hi likh leta hun

koi talwar mere sar pe tani rahti hai

mutmain hun main kisi zaKHmi parinde ki tarah

jagte sote dil-o-jaan pe bani rahti hai

is liye jalta badan le ke chala aata hun

teri palkon ke tale chhaon ghani rahti hai

intizar us ka KHayal us ka tamanna us ki

jo KHayalon mein kahin gul-badani rahti hai

ab yaqini hai nazariye ka tahaffuz yaro

sar pe talwar to gardan pe ani rahti hai

barha chhuT gaya daman-e-shirin 'balraj'

meri taqdir mein bas tesha-zani rahti hai