ek hai phir bhi hai KHuda sab ka

ek hai phir bhī hai ḳhudā sab kā

is kā us kā mirā tirā sab kā

husn-e-mastūr ko 'ayāñ kar de

ek ho jaa.e mudda'ā sab kā

jurm-e-dil kī sazā milī mujh ko

maiñ ne paayā liyā diyā sab kā

naz' meñ de ga.e javāb havās

e’tibār aaj uTh gayā sab kā

ek begāna-ḳhū ko dil de kar

maiñ gunahgār ho gayā sab kā

maiñ kisī kā nahīñ sivā jis ke

haa.e vo hai mire sivā sab kā

aisī kyā ho ga.ī ḳhatā mujh se

mujh pe hai jaur-e-nā-ravā sab kā

sab ko chhoḌā hai maiñ ne jis ke liye

vo sitamgar hai āshnā sab kā

ek manzil hai ai 'nasīm' magar

jāda-e-shauq hai judā sab kā

ek hai phir bhi hai KHuda sab ka

is ka us ka mera tera sab ka

husn-e-mastur ko 'ayan kar de

ek ho jae mudda'a sab ka

jurm-e-dil ki saza mili mujh ko

main ne paya liya diya sab ka

naz' mein de gae jawab hawas

e’tibar aaj uTh gaya sab ka

ek begana-KHu ko dil de kar

main gunahgar ho gaya sab ka

main kisi ka nahin siwa jis ke

hae wo hai mere siwa sab ka

aisi kya ho gai KHata mujh se

mujh pe hai jaur-e-na-rawa sab ka

sab ko chhoDa hai main ne jis ke liye

wo sitamgar hai aashna sab ka

ek manzil hai ai 'nasim' magar

jada-e-shauq hai juda sab ka