ek hum hi nahin taqdir ke mare sahab

ek ham hī nahīñ taqdīr ke maare sāhab

log haiñ baḳht-zada saare ke saare sāhab

merā neze pe sajā sar hai payām-e-ġhairat

koī neze se mirā sar na utāre sāhab

maiñ bhī bachpan meñ ḳhalāoñ kā safar kartā thā

khelā karte the mire saath sitāre sāhab

daf.atan ham ne sila paayā munājātoñ kā

daf.atan sāmne aa.e vo hamāre sāhab

jānvar meñ hayā insāñ se ziyāda dekhī

ulTe bahne lage tahzīb ke dhāre sāhab

mujh meñ duniyā rahī aur maiñ bhī rahā duniyā meñ

mujh ko ghere rahe har vaqt ḳhasāre sāhab

taaki dariyāoñ kī vahshat rahe haavī sab par

Duub jaatā huuñ maiñ dariyā ke kināre sāhab

istaqāmat kā galā ghoñT ke dam lete haiñ

kitne vahshī huā karte haiñ sahāre sāhab

shukriya aap ne bardāsht to kar lī ye ġhazal

aap bhī jā.iye ab ham bhī sidhāre sāhab

ek hum hi nahin taqdir ke mare sahab

log hain baKHt-zada sare ke sare sahab

mera neze pe saja sar hai payam-e-ghairat

koi neze se mera sar na utare sahab

main bhi bachpan mein KHalaon ka safar karta tha

khela karte the mere sath sitare sahab

dafatan hum ne sila paya munajaton ka

dafatan samne aae wo hamare sahab

jaanwar mein haya insan se ziyaada dekhi

ulTe bahne lage tahzib ke dhaare sahab

mujh mein duniya rahi aur main bhi raha duniya mein

mujh ko ghere rahe har waqt KHasare sahab

taki dariyaon ki wahshat rahe hawi sab par

Dub jata hun main dariya ke kinare sahab

istaqamat ka gala ghonT ke dam lete hain

kitne wahshi hua karte hain sahaare sahab

shukriya aap ne bardasht to kar li ye ghazal

aap bhi jaiye ab hum bhi sidhaare sahab