ek manzar pas-e-diwar nazar aata hai

ek manzar pas-e-dīvār nazar aatā hai

ruuh ko aañkh ke us paar nazar aatā hai

apne ā.īne pe ḳhud sang uThā.e hue vo

'aks se bar-sar-e-paikār nazar aatā hai

'ishq kā mo'jiza ye hai ki darūn-e-sīna

dil nahīñ ab mujhe dildār nazar aatā hai

har taraf ek hī jalva hai ki maiñ dekhtā huuñ

har taraf mujh ko mirā yaar nazar aatā hai

ye 'ajab kūcha-e-ḳhush-hāl hai is meñ har shaḳhs

apne hālāt se bezār nazar aatā hai

apne ā.īne se muhtāt raho tum 'āsim'

'aks thāme hue talvār nazar aatā hai

ek manzar pas-e-diwar nazar aata hai

ruh ko aankh ke us par nazar aata hai

apne aaine pe KHud sang uThae hue wo

'aks se bar-sar-e-paikar nazar aata hai

'ishq ka mo'jiza ye hai ki darun-e-sina

dil nahin ab mujhe dildar nazar aata hai

har taraf ek hi jalwa hai ki main dekhta hun

har taraf mujh ko mera yar nazar aata hai

ye 'ajab kucha-e-KHush-haal hai is mein har shaKHs

apne haalat se bezar nazar aata hai

apne aaine se muhtat raho tum 'asim'

'aks thame hue talwar nazar aata hai