ek muddat ho gai koi yahan aaya nahin

ek muddat ho ga.ī koī yahāñ aayā nahīñ

lekin ab to maiñ akele ghar meñ bhī tanhā nahīñ

is baras gulzār meñ ik phuul bhī mahkā nahīñ

shāyad ab mausam pe us kī zulf kā saaya nahīñ

ban ke aatī hai ḳhushī ik naġhma-e-kaif-o-surūr

ġham chalā aatā hai aur āvāz tak detā nahīñ

ab nahīñ khilte haiñ pahle kī tarah ghar meñ gulāb

koī chehra is udaas āñgan meñ ab hañstā nahīñ

kaise kah duuñ zindagī par maiñ ne qaabū pā liyā

mere hāthoñ meñ abhī dāman tirā aayā nahīñ

chāñdnī sajde kiyā kartī hai un ke paañv par

apnī zebā.ī kā ab bhī un ko andāzā nahīñ

fitrat-e-dīvāna ḳhushbū kī tarah āzād hai

tere 'shādāñ' ke liye pābandī-e-sahrā nahīñ

ek muddat ho gai koi yahan aaya nahin

lekin ab to main akele ghar mein bhi tanha nahin

is baras gulzar mein ek phul bhi mahka nahin

shayad ab mausam pe us ki zulf ka saya nahin

ban ke aati hai KHushi ek naghma-e-kaif-o-surur

gham chala aata hai aur aawaz tak deta nahin

ab nahin khilte hain pahle ki tarah ghar mein gulab

koi chehra is udas aangan mein ab hansta nahin

kaise kah dun zindagi par main ne qabu pa liya

mere hathon mein abhi daman tera aaya nahin

chandni sajde kiya karti hai un ke panw par

apni zebai ka ab bhi un ko andaza nahin

fitrat-e-diwana KHushbu ki tarah aazad hai

tere 'shadan' ke liye pabandi-e-sahra nahin