ایک مدت ہو گئی کوئی یہاں آیا نہیں

ایک مدت ہو گئی کوئی یہاں آیا نہیں

لیکن اب تو میں اکیلے گھر میں بھی تنہا نہیں

اس برس گلزار میں اک پھول بھی مہکا نہیں

شاید اب موسم پہ اس کی زلف کا سایہ نہیں

بن کے آتی ہے خوشی اک نغمۂ کیف و سرور

غم چلا آتا ہے اور آواز تک دیتا نہیں

اب نہیں کھلتے ہیں پہلے کی طرح گھر میں گلاب

کوئی چہرہ اس اداس آنگن میں اب ہنستا نہیں

کیسے کہہ دوں زندگی پر میں نے قابو پا لیا

میرے ہاتھوں میں ابھی دامن ترا آیا نہیں

چاندنی سجدے کیا کرتی ہے ان کے پاؤں پر

اپنی زیبائی کا اب بھی ان کو اندازا نہیں

فطرت دیوانہ خوشبو کی طرح آزاد ہے

تیرے شاداںؔ کے لیے پابندیٔ صحرا نہیں