ek muddat se nahin dekhi hai ghar ki surat

ek muddat se nahīñ dekhī hai ghar kī sūrat

gardisheñ aaj bhī lipTī haiñ safar kī sūrat

qafas-e-jāñ meñ na rauzan hai na dar kī sūrat

kaise dekhūñ maiñ yahāñ shams-o-qamar kī sūrat

ab yahī jang kā unvān bhī ho saktā hai

us ne patthar koī pheñkā hai ḳhabar kī sūrat

maañ kī āġhosh se paivand-e-zamīñ hone tak

aa.ine ham ne tarāshe haiñ safar kī sūrat

makḌiyāñ apne hī jāloñ meñ phañsī baiThī haiñ

abhī kal tak to na thī ye mere ghar kī sūrat

roz aḳhbār uThāte haiñ yahī soch ke ham

koī muzhda nazar aa.e to ḳhabar kī sūrat

ham 'ziyā' sar ko bachā.eñ to bachā.eñ kaise

us kā har vaar numāyāñ hai hunar kī sūrat

ek muddat se nahin dekhi hai ghar ki surat

gardishen aaj bhi lipTi hain safar ki surat

qafas-e-jaan mein na rauzan hai na dar ki surat

kaise dekhun main yahan shams-o-qamar ki surat

ab yahi jang ka unwan bhi ho sakta hai

us ne patthar koi phenka hai KHabar ki surat

man ki aaghosh se paiwand-e-zamin hone tak

aaine hum ne tarashe hain safar ki surat

makDiyan apne hi jalon mein phansi baiThi hain

abhi kal tak to na thi ye mere ghar ki surat

roz aKHbar uThate hain yahi soch ke hum

koi muzhda nazar aae to KHabar ki surat

hum 'ziya' sar ko bachaen to bachaen kaise

us ka har war numayan hai hunar ki surat