ek sahra hai meri aankh mein hairani ka

ek sahrā hai mirī aañkh meñ hairānī kā

mere andar to magar shor hai tuġhyānī kā

koī darvesh-e-ḳhudā-mast abhī shahr meñ hai

naqsh baaqī hai abhī dasht kī vīrānī kā

saañs roke hai khaḌī dar se tire duur havā

ḳhāk-e-dil ye hai sabab terī pareshānī kā

ham faqīroñ kā tavakkul hī to sarmāya hai

shikva kis muñh se kareñ be-sar-o-sāmānī kā

dil ke bāzār meñ halchal sī machā dī us ne

mujh ko bhī dhokā huā yusuf-e-lā-sānī kā

dekhtā huuñ maiñ abhī ḳhvāb usī ke shab o roz

ye ḳhulāsa hai mire qissa-e-tūlānī kā

ek sahra hai meri aankh mein hairani ka

mere andar to magar shor hai tughyani ka

koi darwesh-e-KHuda-mast abhi shahr mein hai

naqsh baqi hai abhi dasht ki virani ka

sans roke hai khaDi dar se tere dur hawa

KHak-e-dil ye hai sabab teri pareshani ka

hum faqiron ka tawakkul hi to sarmaya hai

shikwa kis munh se karen be-sar-o-samani ka

dil ke bazar mein halchal si macha di us ne

mujh ko bhi dhoka hua yusuf-e-la-sani ka

dekhta hun main abhi KHwab usi ke shab o roz

ye KHulasa hai mere qissa-e-tulani ka