fana ke raste phulon se bhar gae shayad

fanā ke rāste phūloñ se bhar ga.e shāyad

sitāre manzil-e-shab se guzar ga.e shāyad

na aah dil meñ na āñkhoñ meñ ashk baaqī haiñ

havās rishta-e-ġham paar kar ga.e shāyad

jo nuur bharte the zulmāt-e-shab ke sahrā meñ

vo chāñd taare falak se utar ga.e shāyad

mahakte phuul jo yādoñ meñ muskurāte the

nafas kī tez havā se bikhar ga.e shāyad

vafā kī raah meñ jo qāfile ravāñ the kahīñ

vo manziloñ kā patā hī bisar ga.e shāyad

chalo yahāñ se kahīñ aur mar raheñ māmūn

tuyūr-e-ġham bhī makāñ ḳhālī kar ga.e shāyad

fana ke raste phulon se bhar gae shayad

sitare manzil-e-shab se guzar gae shayad

na aah dil mein na aankhon mein ashk baqi hain

hawas rishta-e-gham par kar gae shayad

jo nur bharte the zulmat-e-shab ke sahra mein

wo chand tare falak se utar gae shayad

mahakte phul jo yaadon mein muskuraate the

nafas ki tez hawa se bikhar gae shayad

wafa ki rah mein jo qafile rawan the kahin

wo manzilon ka pata hi bisar gae shayad

chalo yahan se kahin aur mar rahen mamun

tuyur-e-gham bhi makan KHali kar gae shayad