faraghaton ko bhi masruf-e-kar laya hun

farāġhatoñ ko bhī masrūf-e-kār laayā huuñ

bahār aa.ī nahīñ hai bahār laayā huuñ

mujhe yaqīñ hai ḳhizāñ haath mal rahī hogī

vo phuul shāḳh-e-saman se utaar laayā huuñ

ḳhabar bhī hai tujhe ai ḳhvāb dekhne vaalī

maiñ tere vāste kyā kuchh udhār laayā huuñ

ḳhudā kare na koī in meñ nāma-bar nikle

ki jo parinde maiñ karke shikār laayā huuñ

mire 'azīz zamāna rukā huā hai jahāñ

maiñ us jagah se bhī ḳhud ko guzār laayā huuñ

kuchh itnī sahl na thī dasht-e-jāñ kī ārā.ish

kahāñ kahāñ se uThā kar maiñ ḳhaar laayā huuñ

maiñ kyā karūñ mujhe chehra na mil sakā koī

so aa.ine ke muqābil ġhubār laayā huuñ

faraghaton ko bhi masruf-e-kar laya hun

bahaar aai nahin hai bahaar laya hun

mujhe yaqin hai KHizan hath mal rahi hogi

wo phul shaKH-e-saman se utar laya hun

KHabar bhi hai tujhe ai KHwab dekhne wali

main tere waste kya kuchh udhaar laya hun

KHuda kare na koi in mein nama-bar nikle

ki jo parinde main karke shikar laya hun

mere 'aziz zamana ruka hua hai jahan

main us jagah se bhi KHud ko guzar laya hun

kuchh itni sahl na thi dasht-e-jaan ki aaraish

kahan kahan se uTha kar main KHar laya hun

main kya karun mujhe chehra na mil saka koi

so aaine ke muqabil ghubar laya hun