fareb shab ka giraftar rahun bachao mujhe

fareb shab kā giraftār rahūñ bachāo mujhe

jalā ke sham.a koī rāsta dikhāo mujhe

zabān-e-hāl se kahtī hai yaad maazī kī

tumhārī raah kī dīvār huuñ girāo mujhe

kahāñ huuñ dasht-e-talab meñ mujhe patā to chale

mirā bhī naam pukāro koī bulāo mujhe

maiñ nam zamīn kā paudā huuñ suukh jā.ūñgā

sulagtī dhuup ke sahrā meñ mat lagāo mujhe

koī mata-e-hunar dast-e-be-hunar ke liye

kahāniyāñ na karāmāt kī sunāo mujhe

biThā ke nīche ghaTāte ho kyuuñ mujhe har baar

bhale ko apne kabhī dāhine biThāo mujhe

mire sulūk kī sūrat badal nahīñ saktī

hazār zulm-o-sitam kar ke āzmāo mujhe

ye be-ruḳhī ye taġhāful kahāñ talak pyāre

tumhāre kaam hī ā.ūñgā mat gañvāo mujhe

nigal na jaa.e kahīñ mujh ko dasht-e-ḳhāmoshī

akelā chhoḌ ke jaao na ai sadāo mujhe

mujhe bhī shauq hai paḌhne kā ye kitāb-e-ġhazal

kahīñ se muft meñ haath aa.e to batāo mujhe

fareb shab ka giraftar rahun bachao mujhe

jala ke shama koi rasta dikhao mujhe

zaban-e-haal se kahti hai yaad mazi ki

tumhaari rah ki diwar hun girao mujhe

kahan hun dasht-e-talab mein mujhe pata to chale

mera bhi nam pukaro koi bulao mujhe

main nam zamin ka pauda hun sukh jaunga

sulagti dhup ke sahra mein mat lagao mujhe

koi mata-e-hunar dast-e-be-hunar ke liye

kahaniyan na karamat ki sunao mujhe

biTha ke niche ghaTate ho kyun mujhe har bar

bhale ko apne kabhi dahine biThao mujhe

mere suluk ki surat badal nahin sakti

hazar zulm-o-sitam kar ke aazmao mujhe

ye be-ruKHi ye taghaful kahan talak pyare

tumhaare kaam hi aaunga mat ganwao mujhe

nigal na jae kahin mujh ko dasht-e-KHamoshi

akela chhoD ke jao na ai sadao mujhe

mujhe bhi shauq hai paDhne ka ye kitab-e-ghazal

kahin se muft mein hath aae to batao mujhe