faza-e-lala-o-gul mein wo tazgi na rahi

fazā-e-lāla-o-gul meñ vo tāzgī na rahī

vo kyā ga.e ki bahāroñ meñ dilkashī na rahī

qadam qadam pe haiñ chhā.e hue añdhere se

lahū ke diip jalāo ki raushnī na rahī

mizāj-e-ishq ne ādāb-e-husn apnā.e

dayār-e-ishq meñ vo rasm-e-bandagī na rahī

mire ḳhulūs-e-vafā se abas shikāyat hai

nigāh-e-nāz meñ bhī shān-e-dilbarī na rahī

chamak uThā hai tirī yaad meñ harīm-e-ḳhayāl

shab-e-firāq fazāoñ meñ tīrgī na rahī

tirī nigāh-e-karam zindagī sañvār ga.ī

jahān-e-dil meñ vo pahlī sī barhamī na rahī

chalo ki halqa-e-dār-o-rasan kī baat kareñ

fasāna-e-gul-o-bulbul meñ dilkashī na rahī

faza-e-lala-o-gul mein wo tazgi na rahi

wo kya gae ki bahaaron mein dilkashi na rahi

qadam qadam pe hain chhae hue andhere se

lahu ke dip jalao ki raushni na rahi

mizaj-e-ishq ne aadab-e-husn apnae

dayar-e-ishq mein wo rasm-e-bandagi na rahi

mere KHulus-e-wafa se abas shikayat hai

nigah-e-naz mein bhi shan-e-dilbari na rahi

chamak uTha hai teri yaad mein harim-e-KHayal

shab-e-firaq fazaon mein tirgi na rahi

teri nigah-e-karam zindagi sanwar gai

jahan-e-dil mein wo pahli si barhami na rahi

chalo ki halqa-e-dar-o-rasan ki baat karen

fasana-e-gul-o-bulbul mein dilkashi na rahi