فضائے لالۂ و گل میں وہ تازگی نہ رہی

فضائے لالۂ و گل میں وہ تازگی نہ رہی

وہ کیا گئے کہ بہاروں میں دل کشی نہ رہی

قدم قدم پہ ہیں چھائے ہوئے اندھیرے سے

لہو کے دیپ جلاؤ کہ روشنی نہ رہی

مزاج عشق نے آداب حسن اپنائے

دیار عشق میں وہ رسم بندگی نہ رہی

مرے خلوص وفا سے عبث شکایت ہے

نگاہ ناز میں بھی شان دلبری نہ رہی

چمک اٹھا ہے تری یاد میں حریم خیال

شب فراق فضاؤں میں تیرگی نہ رہی

تری نگاہ کرم زندگی سنوار گئی

جہان دل میں وہ پہلی سی برہمی نہ رہی

چلو کہ حلقۂ دار و رسن کی بات کریں

فسانۂ گل و بلبل میں دل کشی نہ رہی