faza mein kaisi udasi hai kya kaha jae

fazā meñ kaisī udāsī hai kyā kahā jaa.e

'ajīb shaam ye guzrī hai kyā kahā jaa.e

ka.ī gumān hameñ zindagī pe guzre haiñ

ye ajnabī hai ki apnī hai kyā kahā jaa.e

vo dhuup dushman-e-jāñ thī so thī ḳhamosh the ham

ye chāñdnī hameñ Dastī hai kyā kahā jaa.e

yahāñ bhī dil pe udāsī kā chhā rahā hai dhuāñ

ye rang o nuur kī bastī hai kyā kahā jaa.e

koī payām hamāre liye nahīñ na sahī

magar sadā to usī kī hai kyā kahā jaa.e

hamāre 'ahd ke uljhe hue savāloñ kā

javāb sirf ḳhamoshī hai kyā kahā jaa.e

zabāñ pe shukr o shikāyat ke sau fasāne haiñ

magar jo dil pe guzartī hai kyā kahā jaa.e

tamām shahr ko kyuuñ chup lagī hai kyā jāneñ

ghuTan diloñ meñ ye kaisī hai kyā kahā jaa.e

shanāḳht dost na dushman kī mo'tabar 'maḳhmūr'

har ek shakl hī dhuñdlī hai kyā kahā jaa.e

faza mein kaisi udasi hai kya kaha jae

'ajib sham ye guzri hai kya kaha jae

kai guman hamein zindagi pe guzre hain

ye ajnabi hai ki apni hai kya kaha jae

wo dhup dushman-e-jaan thi so thi KHamosh the hum

ye chandni hamein Dasti hai kya kaha jae

yahan bhi dil pe udasi ka chha raha hai dhuan

ye rang o nur ki basti hai kya kaha jae

koi payam hamare liye nahin na sahi

magar sada to usi ki hai kya kaha jae

hamare 'ahd ke uljhe hue sawalon ka

jawab sirf KHamoshi hai kya kaha jae

zaban pe shukr o shikayat ke sau fasane hain

magar jo dil pe guzarti hai kya kaha jae

tamam shahr ko kyun chup lagi hai kya jaanen

ghuTan dilon mein ye kaisi hai kya kaha jae

shanaKHt dost na dushman ki mo'tabar 'maKHmur'

har ek shakl hi dhundli hai kya kaha jae