fikr-e-gham-e-jahan se ghafil hua hun main

fikr-e-ġham-e-jahān se ġhāfil huā huuñ maiñ

yā'nī kahīñ du'āoñ meñ shāmil rahā huuñ maiñ

andar se jāntā huuñ maiñ andar ke shaḳhs ko

kyā soch ke phir us ke muqābil khaḌā huuñ maiñ

us bevafā ke be meñ se ye ko alif kiyā

mehnat ke baa'd 'ishq ke qābil banā huuñ maiñ

dīvāngī hai shart to rahne ko dasht meñ

majnūñ ke bhes meñ vahāñ dāḳhil huā huuñ maiñ

ḳhvāboñ kā qatl kar diyā āñkheñ bhī phoḌ liiñ

qātil kabhī rahā kabhī bismil rahā huuñ maiñ

dillī 'ajīb shahr hai dil vāloñ kā janāb

dil vāloñ ke bhī shahr meñ be-dil rahā huuñ maiñ

har chand haq ke saath khaḌā 'ramz' thā magar

tārīḳh likhne vāloñ ko bātil lagā huuñ maiñ

fikr-e-gham-e-jahan se ghafil hua hun main

ya'ni kahin du'aon mein shamil raha hun main

andar se jaanta hun main andar ke shaKHs ko

kya soch ke phir us ke muqabil khaDa hun main

us bewafa ke be mein se ye ko alif kiya

mehnat ke ba'd 'ishq ke qabil bana hun main

diwangi hai shart to rahne ko dasht mein

majnun ke bhes mein wahan daKHil hua hun main

KHwabon ka qatl kar diya aankhen bhi phoD lin

qatil kabhi raha kabhi bismil raha hun main

dilli 'ajib shahr hai dil walon ka janab

dil walon ke bhi shahr mein be-dil raha hun main

har chand haq ke sath khaDa 'ramz' tha magar

tariKH likhne walon ko baatil laga hun main