fikr-e-jahan se khele zor-e-butan se khele

fikr-e-jahāñ se khele zor-e-butāñ se khele

ham daur-e-zindagī meñ har imtihāñ se khele

phūloñ se koī khelā kaliyoñ se koī uljhā

ham dard-āshnā the dard-e-nihāñ se khele

jab bichhḌe dostoñ kī yaad i baiThe baiThe

ham be-qarār ho kar ashk-e-ravāñ se khele

āsāñ na thā guzarnā kuchh rāh-e-āshiqī se

hastī miTā.ī apnī apnī hī jaañ se khele

duniyāñ kī fikr kaisī uqbā kā ḳhauf kaisā

saaqī kī ik nazar par ham do-jahāñ se khele

go husn-e-dilrubā hai dil kī ḳhalish balā hai

khele sambhal ke vo jo ishq-e-butāñ se khele

maazī ne dī sadā.eñ dekhā magar na muḌ kar

ham yuuñ 'habīb' aksar umr-e-ravāñ se khele

fikr-e-jahan se khele zor-e-butan se khele

hum daur-e-zindagi mein har imtihan se khele

phulon se koi khela kaliyon se koi uljha

hum dard-ashna the dard-e-nihan se khele

jab bichhDe doston ki yaad i baiThe baiThe

hum be-qarar ho kar ashk-e-rawan se khele

aasan na tha guzarna kuchh rah-e-ashiqi se

hasti miTai apni apni hi jaan se khele

duniyan ki fikr kaisi uqba ka KHauf kaisa

saqi ki ek nazar par hum do-jahan se khele

go husn-e-dilruba hai dil ki KHalish bala hai

khele sambhal ke wo jo ishq-e-butan se khele

mazi ne di sadaen dekha magar na muD kar

hum yun 'habib' aksar umr-e-rawan se khele