firaq mein dam ulajh raha hai KHayal-e-gesu mein jaankani hai

firāq meñ dam ulajh rahā hai ḳhayāl-e-gesū meñ jāñkanī hai

tanāb-e-jallād kī tarah se rag-e-gulū āj-kal tanī hai

nahīñ hai parvā-e-māl-o-daulat safā-e-bātin se dil ġhanī hai

gadā haiñ hājat-ravā-e-sultāñ ye kīmiyā-e-farotanī hai

jigar meñ haiñ dāġh-e-mahr-o-ulfat shigāf-e-pahlū hai jeb-e-mashriq

shab-e-lahad hai ki sub.h-e-mahshar ye kis qayāmat kī raushnī hai

fazā.el-e-ittihād-e-millat jahāñ meñ vaj.h-e-muḳhālifat haiñ

muaaf hī rakhiye shaiḳh sāhab ye rahbarī hai ki rahzanī hai

ġharaz na rakkhe mai-e-jahāñ se to ham bhī qaa.il hoñ tere vaa.iz

kamāl kyā jab ummīd-e-fardā hī illat-e-pāk-dāmanī hai

hameñ na raas aayā dil lagānā ġhazab huā phir gayā zamāna

koī to kahtā hai qaid kar do koī ye kahtā hai kushtanī hai

raqīb ko paas gar biThāyā to mujh se hargiz na zabt hogā

miTā hī duuñ ek din ye jhagḌā bas ab to dil meñ yahī Thanī hai

koī kisī se na dil lagā.e na sar pe koh-e-alam uThā.e

nahīñ bharosa ḳhudā bachā.e ki ishq meñ jaan par banī hai

khapī hai dil meñ hañsī tumhārī firāq meñ kauñdtī hai bijlī

raheñ na kyuuñ ashk-e-surḳh jaarī jigar meñ almās kī kanī hai

kabhī to aa mere rashk-e-īsā huī hai muzmin tap-e-judā.ī

nahīñ shifā kī ummīd baaqī numūd chehre se murdanī hai

huā ye lāġhar asiir terā ki sab ko hai naqsh-e-pā kā dhokā

gale meñ jo tauq thā pahnāyā vo ab use hisn-e-āhanī hai

na teġh-e-qātil kā kyuuñ ho shohrā kiyā hai jo rañg-e-jism aisā

diye jo Tāñke to hai ye dhokā badan kā malbūs sozanī hai

zamīn par girte girte ham ko sunā gayā kāsa-e-sifālīñ

huā jahāñ daur-e-umr-e-āḳhir ye sāz-e-hastī shikastnī hai

jigar meñ barsoñ khaTak rahegī phuñkeñge pahlū chamak rahegī

ḳhayāl-e-mizhgān-e-yār-e-jānī sinān-e-dil-doz kī anī hai

azal se rindoñ ko mai kī aadat hai aur vaa.iz kī sarzanish kī

taḳhāluf-e-vaz.a se hai jhagḌā na dostī hai na dushmanī hai

'habīb' piirī meñ haiñ rañgīlī vo sabza rañgoñ hī par haiñ marte

hue haiñ do din pata nahīñ hai kisī se gahrī kahīñ chhanī hai

firaq mein dam ulajh raha hai KHayal-e-gesu mein jaankani hai

tanab-e-jallad ki tarah se rag-e-gulu aaj-kal tani hai

nahin hai parwa-e-mal-o-daulat safa-e-baatin se dil ghani hai

gada hain hajat-rawa-e-sultan ye kimiya-e-farotani hai

jigar mein hain dagh-e-mahr-o-ulfat shigaf-e-pahlu hai jeb-e-mashriq

shab-e-lahad hai ki subh-e-mahshar ye kis qayamat ki raushni hai

fazael-e-ittihad-e-millat jahan mein wajh-e-muKHalifat hain

muaf hi rakhiye shaiKH sahab ye rahbari hai ki rahzani hai

gharaz na rakkhe mai-e-jahan se to hum bhi qail hon tere waiz

kamal kya jab ummid-e-farda hi illat-e-pak-damani hai

hamein na ras aaya dil lagana ghazab hua phir gaya zamana

koi to kahta hai qaid kar do koi ye kahta hai kushtani hai

raqib ko pas gar biThaya to mujh se hargiz na zabt hoga

miTa hi dun ek din ye jhagDa bas ab to dil mein yahi Thani hai

koi kisi se na dil lagae na sar pe koh-e-alam uThae

nahin bharosa KHuda bachae ki ishq mein jaan par bani hai

khapi hai dil mein hansi tumhaari firaq mein kaundti hai bijli

rahen na kyun ashk-e-surKH jari jigar mein almas ki kani hai

kabhi to aa mere rashk-e-isa hui hai muzmin tap-e-judai

nahin shifa ki ummid baqi numud chehre se murdani hai

hua ye laghar asir tera ki sab ko hai naqsh-e-pa ka dhoka

gale mein jo tauq tha pahnaya wo ab use hisn-e-ahani hai

na tegh-e-qatil ka kyun ho shohra kiya hai jo rang-e-jism aisa

diye jo Tanke to hai ye dhoka badan ka malbus sozani hai

zamin par girte girte hum ko suna gaya kasa-e-sifalin

hua jahan daur-e-umr-e-aKHir ye saz-e-hasti shikastni hai

jigar mein barson khaTak rahegi phunkenge pahlu chamak rahegi

KHayal-e-mizhgan-e-yar-e-jaani sinan-e-dil-doz ki ani hai

azal se rindon ko mai ki aadat hai aur waiz ki sarzanish ki

taKHaluf-e-waza se hai jhagDa na dosti hai na dushmani hai

'habib' piri mein hain rangili wo sabza rangon hi par hain marte

hue hain do din pata nahin hai kisi se gahri kahin chhani hai