firaq mein KHun-e-dil hain pite sharab hum le ke kya karenge

firāq meñ ḳhūn-e-dil haiñ piite sharāb ham le ke kyā kareñge

hamārā dil aap bhun rahā hai kabāb ham le ke kyā kareñge

jo un se kahtā huuñ yaar hāzir hai ye hamārā dil-e-shikasta

to hañs ke kahte haiñ naaz se vo janāb ham le ke kyā kareñge

nahīñ hai fursat yahīñ ke jhagḌoñ se fikr-e-uqbā kahāñ kī vaa.iz

azāb-e-duniyā hai ham ko kyā kam savāb ham le ke kyā kareñge

savāl be-sūd jānte haiñ raheñ na ḳhāmosh to kareñ kyā

evaz meñ bose ke tum se sāhab javāb ham le ke kyā kareñge

ye qaul hai rahmat-e-ḳhudā kā Daro na tum ai gunāh-gāro

shumār-e-isyāñ agar nahīñ hai hisāb ham le ke kyā kareñge

firaq mein KHun-e-dil hain pite sharab hum le ke kya karenge

hamara dil aap bhun raha hai kabab hum le ke kya karenge

jo un se kahta hun yar hazir hai ye hamara dil-e-shikasta

to hans ke kahte hain naz se wo janab hum le ke kya karenge

nahin hai fursat yahin ke jhagDon se fikr-e-uqba kahan ki waiz

azab-e-duniya hai hum ko kya kam sawab hum le ke kya karenge

sawal be-sud jaante hain rahen na KHamosh to karen kya

ewaz mein bose ke tum se sahab jawab hum le ke kya karenge

ye qaul hai rahmat-e-KHuda ka Daro na tum ai gunah-garo

shumar-e-isyan agar nahin hai hisab hum le ke kya karenge