firaun-e-waqt koi bhi ho sar-kashi karo

fir.aun-e-vaqt koī bhī ho sar-kashī karo

yārān-e-shahr merī tarah zindagī karo

amrit nahīñ nasīb to zahrāb hī sahī

kuchh to ilāj-e-shiddat-e-tishna-labī karo

ye zulmat-e-tamām musalsal nahīñ qubūl

dil kā lahū balā se jale raushnī karo

muñh dekhī dostī se ab uktā gayā hai dil

yaaro karo ḳhulūs se go dushmanī karo

ham har-nafas khilā.enge apne lahū se phuul

tum ehtimām-e-dār-o-rasan har ghaḌī karo

har sher ābgīna hai mauj-e-ḳhayāl kā

lo kaam ehtiyāt se jab shā.irī karo

kaliyāñ khilāne aa.egā jhoñkā nasīm kā

tum raah meñ hazār fasīleñ khaḌī karo

firaun-e-waqt koi bhi ho sar-kashi karo

yaran-e-shahr meri tarah zindagi karo

amrit nahin nasib to zahrab hi sahi

kuchh to ilaj-e-shiddat-e-tishna-labi karo

ye zulmat-e-tamam musalsal nahin qubul

dil ka lahu bala se jale raushni karo

munh dekhi dosti se ab ukta gaya hai dil

yaro karo KHulus se go dushmani karo

hum har-nafas khilaenge apne lahu se phul

tum ehtimam-e-dar-o-rasan har ghaDi karo

har sher aabgina hai mauj-e-KHayal ka

lo kaam ehtiyat se jab shairi karo

kaliyan khilane aaega jhonka nasim ka

tum rah mein hazar fasilen khaDi karo