fughan-o-ah hai har-dam pukar rakhta hai

fuġhān-o-āh hai har-dam pukār rakhtā hai

ġhazab meñ jaan dil-e-be-qarār rakhtā hai

gul-e-chaman na dur-e-shāhvār rakhtā hai

bharā bharā jo badan merā yaar rakhtā hai

latīf ruuh kī mānind jism hai kis kā

piyāda kaun vaqār-e-savār rakhtā hai

judā judā hai hasīnān-e-dahr kā andāz

har ek tarah kī har gul bahār rakhtā hai

fareb-e-husn se allāh aadmī ko bachā

chale ye pech to rustam ko maar rakhtā hai

kamāl-e-ishq ko paatā huuñ ḳhāksārī meñ

taraf nasheb ke dariyā guzār rakhtā hai

bahār aa.ī hai bint-ul-inab pe joban hai

girah meñ daam koī bāda-ḳhvār rakhtā hai

sunā hai jab se ki haiñ dafan us meñ āshiq-e-zār

qadam zamīñ pe nahīñ vo nigār rakhtā hai

har ek shīsha-e-sā.at falak ko kahtā hai

ki 'muntahī' se sarāsar ġhubār rakhtā hai

fughan-o-ah hai har-dam pukar rakhta hai

ghazab mein jaan dil-e-be-qarar rakhta hai

gul-e-chaman na dur-e-shahwar rakhta hai

bhara bhara jo badan mera yar rakhta hai

latif ruh ki manind jism hai kis ka

piyaada kaun waqar-e-sawar rakhta hai

juda juda hai hasinan-e-dahr ka andaz

har ek tarah ki har gul bahaar rakhta hai

fareb-e-husn se allah aadmi ko bacha

chale ye pech to rustam ko mar rakhta hai

kamal-e-ishq ko pata hun KHaksari mein

taraf nasheb ke dariya guzar rakhta hai

bahaar aai hai bint-ul-inab pe joban hai

girah mein dam koi baada-KHwar rakhta hai

suna hai jab se ki hain dafan us mein aashiq-e-zar

qadam zamin pe nahin wo nigar rakhta hai

har ek shisha-e-saat falak ko kahta hai

ki 'muntahi' se sarasar ghubar rakhta hai