gahe gahe wo chale aate hain diwane ke pas

gaahe gaahe vo chale aate haiñ dīvāne ke paas

jaise aatī haiñ bahāreñ saj ke vīrāne ke paas

pārsā.ī shaiḳh-sāhab kī bhī ab mashkūk hai

shaam ko dekhā hai ham ne un ko maiḳhāne ke paas

ranj-o-ġham afsurdagī māyūsiyāñ majbūriyāñ

tere ġham meñ kyā nahīñ hai tere dīvāne ke paas

gulsitāñ kaise jalā kuchh kah nahīñ saktā magar

barq lahrā.ī thī shāyad mere kāshāne ke paas

maiñ vo kāfir huuñ nahīñ miltā kahīñ jis kā javāb

maiñ ne masjid apnī banvā lī sanam-ḳhāne ke paas

maiñ tirī mahfil meñ aayā kuchh nahīñ merī ḳhatā

log aa jaate haiñ aksar jāne-pahchāne ke paas

ho ga.e 'jāñbāz' vo merī vafā ke mo'tarif

tazkira karte haiñ merā apne begāne ke paas

gahe gahe wo chale aate hain diwane ke pas

jaise aati hain bahaaren saj ke virane ke pas

parsai shaiKH-sahab ki bhi ab mashkuk hai

sham ko dekha hai hum ne un ko maiKHane ke pas

ranj-o-gham afsurdagi mayusiyan majburiyan

tere gham mein kya nahin hai tere diwane ke pas

gulsitan kaise jala kuchh kah nahin sakta magar

barq lahrai thi shayad mere kashane ke pas

main wo kafir hun nahin milta kahin jis ka jawab

main ne masjid apni banwa li sanam-KHane ke pas

main teri mahfil mein aaya kuchh nahin meri KHata

log aa jate hain aksar jaane-pahchane ke pas

ho gae 'jaanbaz' wo meri wafa ke mo'tarif

tazkira karte hain mera apne begane ke pas