ganw ke ek chhoTe se ghar mein kuchh lamhe mahtab raha

gaañv ke ik chhoTe se ghar meñ kuchh lamhe mahtāb rahā

lekin us kī yaad kā paudā barsoñ tak shādāb rahā

ai mire haal kī dushman yaado kyā us ko taskīn milī

maazī meñ jo shaḳhs harīf-e-taskīn-e-ā'sāb rahā

apnī saarī gum-shuda bheḌeñ jam' to kiiñ charvāhe ne

un bheḌoñ ke pīchhe pīchhe puure din betāb rahā

fasl-e-ḳhizāñ kī shāḳh se lipTā bele kā ik tanhā phuul

kuchh kaliyoñ kī yaad sameTe rātoñ ko be-ḳhvāb rahā

bichhḌe the to sākit palkeñ sūkhe peḌ kī shāḳheñ thiiñ

us se bichhaḌ kar duur chale to kosoñ tak sailāb rahā

pichhlī raat ke pyāse lamhe jin galiyoñ meñ biit ga.e

un galiyoñ ko chhoḌ ke puure shahr meñ qaht-e-āb rahā

jism ne apnī 'umr guzārī sindh ke registānoñ meñ

dil kam-baḳht baḌā ziddī thā āḳhir tak panjāb rahā

us kī fitrat jānñe vaale tark-e-adab se jiit ga.e

kitnā tang-nazar thā 'tālib' pāband-e-ādāb rahā

ganw ke ek chhoTe se ghar mein kuchh lamhe mahtab raha

lekin us ki yaad ka pauda barson tak shadab raha

ai mere haal ki dushman yaado kya us ko taskin mili

mazi mein jo shaKHs harif-e-taskin-e-a'sab raha

apni sari gum-shuda bheDen jam' to kin charwahe ne

un bheDon ke pichhe pichhe pure din betab raha

fasl-e-KHizan ki shaKH se lipTa bele ka ek tanha phul

kuchh kaliyon ki yaad sameTe raaton ko be-KHwab raha

bichhDe the to sakit palken sukhe peD ki shaKHen thin

us se bichhaD kar dur chale to koson tak sailab raha

pichhli raat ke pyase lamhe jin galiyon mein bit gae

un galiyon ko chhoD ke pure shahr mein qaht-e-ab raha

jism ne apni 'umr guzari sindh ke registanon mein

dil kam-baKHt baDa ziddi tha aaKHir tak panjab raha

us ki fitrat jaanne wale tark-e-adab se jit gae

kitna tang-nazar tha 'talib' paband-e-adab raha