ghaib maujud hai manzar mein ayan hone tak

ġhaib maujūd hai manzar meñ 'ayāñ hone tak

ye haqīqat bhī haqīqat hai gumāñ hone tak

ab samajh aa.e mohabbat ke taqāze tujh ko

der kī tū ne javānī meñ javāñ hone tak

daaġh muddat meñ banā terā lagāyā huā zaḳhm

vaqt lagtā hai nishānī ko nishāñ hone tak

vaqt se pahle 'ibādat pe nahīñ hai bandish

ḳhair ḳhairāt kiye jaao azaañ hone tak

chashm-e-bedār ye samjhā.eñ tujhe ham kaise

niiñd jhelī hai bahut ḳhvāb 'ayāñ hone tak

sabr ke saḳht marāhil se guzāra gayā zabt

chup kī tahvīl meñ thī aah fuġhāñ hone tak

baiTh ārām se 'āsim' ki savārī kuchh der

sust chaltī hai ravānī se ravāñ hone tak

ghaib maujud hai manzar mein 'ayan hone tak

ye haqiqat bhi haqiqat hai guman hone tak

ab samajh aae mohabbat ke taqaze tujh ko

der ki tu ne jawani mein jawan hone tak

dagh muddat mein bana tera lagaya hua zaKHm

waqt lagta hai nishani ko nishan hone tak

waqt se pahle 'ibaadat pe nahin hai bandish

KHair KHairaat kiye jao azan hone tak

chashm-e-bedar ye samjhaen tujhe hum kaise

nind jheli hai bahut KHwab 'ayan hone tak

sabr ke saKHt marahil se guzara gaya zabt

chup ki tahwil mein thi aah fughan hone tak

baiTh aaram se 'asim' ki sawari kuchh der

sust chalti hai rawani se rawan hone tak