غیب موجود ہے منظر میں عیاں ہونے تک

غیب موجود ہے منظر میں عیاں ہونے تک

یہ حقیقت بھی حقیقت ہے گماں ہونے تک

اب سمجھ آئے محبت کے تقاضے تجھ کو

دیر کی تو نے جوانی میں جواں ہونے تک

داغ مدت میں بنا تیرا لگایا ہوا زخم

وقت لگتا ہے نشانی کو نشاں ہونے تک

وقت سے پہلے عبادت پہ نہیں ہے بندش

خیر خیرات کئے جاؤ اذاں ہونے تک

چشم بیدار یہ سمجھائیں تجھے ہم کیسے

نیند جھیلی ہے بہت خواب عیاں ہونے تک

صبر کے سخت مراحل سے گزارہ گیا ضبط

چپ کی تحویل میں تھی آہ فغاں ہونے تک

بیٹھ آرام سے عاصمؔ کہ سواری کچھ دیر

سست چلتی ہے روانی سے رواں ہونے تک