ghair apne hain kab parae hain

ġhair apne haiñ kab parā.e haiñ

vaqt par mere kaam aa.e haiñ

rāh-e-hastī meñ mere gām-ba-gām

terī yādoñ ke kitne saa.e haiñ

ba.az auqāt ye huā mahsūs

jitne apne haiñ sab parā.e haiñ

ham ne bāñdhā tasavvur-e-manzil

jab qadam rah meñ Dagmagā.e haiñ

ek tūfān ashk-o-āh meñ bhī

ham ba-sad azm muskurā.e haiñ

uf vo mauj-e-havā-e-tūfānī

jis ne jalte diye bujhā.e haiñ

jis se ho indimāl-e-zaḳhm-e-hayāt

ham vo darmān le ke aa.e haiñ

aaj ke daur meñ siyāsat ne

kaise kaise ye gul khilā.e haiñ

ziist kī chilchilātī dhuup meñ bhī

terī zulfoñ ke ThanDe saa.e haiñ

un se pūchhe koī bahā-e-hayāt

daar ko chuum kar jo aa.e haiñ

vaqt ne jin kī yaad dafnā dī

mujh ko aksar vo yaad aa.e haiñ

aaj sarkār-e-husn meñ 'maġhmūm

ham bhī chand ashk le ke aa.e haiñ

ghair apne hain kab parae hain

waqt par mere kaam aae hain

rah-e-hasti mein mere gam-ba-gam

teri yaadon ke kitne sae hain

baz auqat ye hua mahsus

jitne apne hain sab parae hain

hum ne bandha tasawwur-e-manzil

jab qadam rah mein Dagmagae hain

ek tufan ashk-o-ah mein bhi

hum ba-sad azm muskurae hain

uf wo mauj-e-hawa-e-tufani

jis ne jalte diye bujhae hain

jis se ho indimal-e-zaKHm-e-hayat

hum wo darman le ke aae hain

aaj ke daur mein siyasat ne

kaise kaise ye gul khilae hain

zist ki chilchilati dhup mein bhi

teri zulfon ke ThanDe sae hain

un se puchhe koi baha-e-hayat

dar ko chum kar jo aae hain

waqt ne jin ki yaad dafna di

mujh ko aksar wo yaad aae hain

aaj sarkar-e-husn mein 'maghmum

hum bhi chand ashk le ke aae hain