ghair-mumkin tha charaghon pe guzara apna

ġhair-mumkin thā charāġhoñ pe guzāra apnā

saath laayā huuñ zamīñ par maiñ sitāra apnā

ab to jis rau meñ bhī hogī tag-o-dau meñ hogī

chashm-e-nam chhoḌ chukī kab se kināra apnā

ek usī ḳhatt-e-kam-āmez pe sarhad apnī

vahī ik manzar-e-nādīda hamārā apnā

haath ik ġhaar ke andar se baḌhā merī taraf

āḳhir asbāb-e-safar sar se utārā apnā

yahī bandish ki jise dil bhī kaheñ duniyā bhī

isī andar kī girah par hai guzāra apnā

ik sadā ubhrī thī siine meñ ki phir Duub ga.ī

qāfila chhūT gayā jaise dobāra apnā

'arsa-e-jāñ meñ sahī mohlat-e-vahshat to milī

koī sahrā to huā saare kā saarā apnā

ghair-mumkin tha charaghon pe guzara apna

sath laya hun zamin par main sitara apna

ab to jis rau mein bhi hogi tag-o-dau mein hogi

chashm-e-nam chhoD chuki kab se kinara apna

ek usi KHatt-e-kam-amez pe sarhad apni

wahi ek manzar-e-nadida hamara apna

hath ek ghaar ke andar se baDha meri taraf

aaKHir asbab-e-safar sar se utara apna

yahi bandish ki jise dil bhi kahen duniya bhi

isi andar ki girah par hai guzara apna

ek sada ubhri thi sine mein ki phir Dub gai

qafila chhuT gaya jaise dobara apna

'arsa-e-jaan mein sahi mohlat-e-wahshat to mili

koi sahra to hua sare ka sara apna