ghairat-e-ruKH se hua hai tere be-nur charagh

ġhairat-e-ruḳh se huā hai tire be-nūr charāġh

tū jo ho paas to kyūñkar na karūñ duur charāġh

ġharq hai bas araq-e-sharm meñ tere ruḳh se

ho na kyoñ parda-e-fānūs meñ mastūr charāġh

ġhash na khā.eñge kabhī tālib-e-dīdār tire

nahīñ muusā ye dikhā.egā jinheñ tuur charāġh

ġhaur kar āshiq-o-māshūq meñ hai ek hī nuur

ḳhud hī parvāna hai aur aap hī mash.hūr charāġh

ham jaleñ ātish-e-furqat se magar sad afsos

baar paa.e tirī ḳhalvat meñ ba-dastūr charāġh

havas itnī hai ki ai sham.a tirī mahfil meñ

soz-e-dil kā mire kar de kabhī mazkūr charāġh

ġhul machā ye ki huī sub.h ye niklā ḳhurshīd

tere aate hī huā raat ko mastūr charāġh

shab ko is tarh bharī us ne mai-e-ātish-rang

haath vo taaq huā sāġhar-e-billor charāġh

ġhair kī nazroñ meñ kab husn tirā paa.e faroġh

laakh pur-nūr ho dekhe na magar kor charāġh

kaaTe khāte haiñ ġham-e-hijr-e-sanam meñ 'bāqī'

sham.a sayyāre sitāre shab-e-dījūr charāġh

ghairat-e-ruKH se hua hai tere be-nur charagh

tu jo ho pas to kyunkar na karun dur charagh

gharq hai bas araq-e-sharm mein tere ruKH se

ho na kyon parda-e-fanus mein mastur charagh

ghash na khaenge kabhi talib-e-didar tere

nahin musa ye dikhaega jinhen tur charagh

ghaur kar aashiq-o-mashuq mein hai ek hi nur

KHud hi parwana hai aur aap hi mashhur charagh

hum jalen aatish-e-furqat se magar sad afsos

bar pae teri KHalwat mein ba-dastur charagh

hawas itni hai ki ai shama teri mahfil mein

soz-e-dil ka mere kar de kabhi mazkur charagh

ghul macha ye ki hui subh ye nikla KHurshid

tere aate hi hua raat ko mastur charagh

shab ko is tarh bhari us ne mai-e-atish-rang

hath wo taq hua saghar-e-billor charagh

ghair ki nazron mein kab husn tera pae farogh

lakh pur-nur ho dekhe na magar kor charagh

kaTe khate hain gham-e-hijr-e-sanam mein 'baqi'

shama sayyare sitare shab-e-dijur charagh