غیرت رخ سے ہوا ہے ترے بے نور چراغ

غیرت رخ سے ہوا ہے ترے بے نور چراغ

تو جو ہو پاس تو کیوں کر نہ کروں دور چراغ

غرق ہے بس عرق شرم میں تیرے رخ سے

ہو نہ کیوں پردۂ فانوس میں مستور چراغ

غش نہ کھائیں گے کبھی طالب دیدار ترے

نہیں موسیٰ یہ دکھائے گا جنہیں طور چراغ

غور کر عاشق و معشوق میں ہے ایک ہی نور

خود ہی پروانہ ہے اور آپ ہی مشہور چراغ

ہم جلیں آتش فرقت سے مگر صد افسوس

بار پائے تری خلوت میں بدستور چراغ

ہوس اتنی ہے کہ اے شمع تری محفل میں

سوز دل کا مرے کر دے کبھی مذکور چراغ

غل مچا یہ کہ ہوئی صبح یہ نکلا خورشید

تیرے آتے ہی ہوا رات کو مستور چراغ

شب کو اس طرح بھری اس نے مے آتش رنگ

ہاتھ وہ طاق ہوا ساغر بلور چراغ

غیر کی نظروں میں کب حسن ترا پائے فروغ

لاکھ پر نور ہو دیکھے نہ مگر کور چراغ

کاٹے کھاتے ہیں غم ہجر صنم میں باقیؔ

شمع سیارے ستارے شب دیجور چراغ