galiyon mein bhaTakna rah-e-alam mein rahna

galiyoñ meñ bhaTaknā rah-e-ālām meñ rahnā

yaañ sab ko hai nākāmī-e-yak-gām meñ rahnā

pahle to bikhar jaanā guzargāhoñ ke hamrāh

phir hasrat-e-dīvār-o-dar-o-bām meñ rahnā

bāġhāt meñ phirnā ḳhas-o-ḳhāshāk pahan kar

har silsila-e-sabz ke anjām meñ rahnā

har saañs meñ ghulnā tirī dahlīz kī ḳhushbū

har aañkh kā duurī ke siyah daam meñ rahnā

āvāz na aanā kisī ābād makāñ se

har haath kā yaañ dastak-e-nākām meñ rahnā

kuchh der meñ khul jā.egā bastī kā nasība

kuchh der hai aur saḳhtī-ayyām meñ rahnā

'ejāz' bahut din se hai shohrat kā bulāvā

tum ho ki vahī qarya-e-gumnām meñ rahnā

galiyon mein bhaTakna rah-e-alam mein rahna

yan sab ko hai nakaami-e-yak-gam mein rahna

pahle to bikhar jaana guzargahon ke hamrah

phir hasrat-e-diwar-o-dar-o-baam mein rahna

baghat mein phirna KHas-o-KHashak pahan kar

har silsila-e-sabz ke anjam mein rahna

har sans mein ghulna teri dahliz ki KHushbu

har aankh ka duri ke siyah dam mein rahna

aawaz na aana kisi aabaad makan se

har hath ka yan dastak-e-nakaam mein rahna

kuchh der mein khul jaega basti ka nasiba

kuchh der hai aur saKHti-ayyam mein rahna

'ejaz' bahut din se hai shohrat ka bulawa

tum ho ki wahi qarya-e-gumnam mein rahna