gham-e-firaq mein gar hum dahak rahe hote

ġham-e-firāq meñ gar ham dahak rahe hote

to āftāb se baḌh kar chamak rahe hote

badan kī sigḌī ke sho'loñ pe pak rahe hote

vo mere saath agar sub.h tak rahe hote

sukūn miltā hameñ jo ye kaash ho jaatā

ki ham bhī yaar ke dil kī kasak rahe hote

tirī nazar se utarnā bhī ek ne'mat hai

vagarna āñkhoñ meñ sab kī khaTak rahe hote

laboñ kā ras hameñ miltā to shahd hote ham

agar jo āñkhoñ meñ hote namak rahe hote

agar shajar jo na hote to ham se ḳhush-qismat

kisī kī zulf kisī kī palak rahe hote

sarā.e chhoḌī to ghar tak pahuñch sake haiñ ham

badan meñ rahte to ab tak bhaTak rahe hote

agar ye 'nūr' miyāñ aadmī na hote to

vo manziloñ se milātī saḌak rahe hote

gham-e-firaq mein gar hum dahak rahe hote

to aaftab se baDh kar chamak rahe hote

badan ki sigDi ke sho'lon pe pak rahe hote

wo mere sath agar subh tak rahe hote

sukun milta hamein jo ye kash ho jata

ki hum bhi yar ke dil ki kasak rahe hote

teri nazar se utarna bhi ek ne'mat hai

wagarna aankhon mein sab ki khaTak rahe hote

labon ka ras hamein milta to shahd hote hum

agar jo aankhon mein hote namak rahe hote

agar shajar jo na hote to hum se KHush-qismat

kisi ki zulf kisi ki palak rahe hote

sarae chhoDi to ghar tak pahunch sake hain hum

badan mein rahte to ab tak bhaTak rahe hote

agar ye 'nur' miyan aadmi na hote to

wo manzilon se milati saDak rahe hote