غم فراق میں گر ہم دہک رہے ہوتے

غم فراق میں گر ہم دہک رہے ہوتے

تو آفتاب سے بڑھ کر چمک رہے ہوتے

بدن کی سگڑی کے شعلوں پہ پک رہے ہوتے

وہ میرے ساتھ اگر صبح تک رہے ہوتے

سکون ملتا ہمیں جو یہ کاش ہو جاتا

کہ ہم بھی یار کے دل کی کسک رہے ہوتے

تری نظر سے اترنا بھی ایک نعمت ہے

وگرنہ آنکھوں میں سب کی کھٹک رہے ہوتے

لبوں کا رس ہمیں ملتا تو شہد ہوتے ہم

اگر جو آنکھوں میں ہوتے نمک رہے ہوتے

اگر شجر جو نہ ہوتے تو ہم سے خوش قسمت

کسی کی زلف کسی کی پلک رہے ہوتے

سرائے چھوڑی تو گھر تک پہنچ سکے ہیں ہم

بدن میں رہتے تو اب تک بھٹک رہے ہوتے

اگر یہ نورؔ میاں آدمی نہ ہوتے تو

وہ منزلوں سے ملاتی سڑک رہے ہوتے