gham-e-hayat ko hairat mein Dalte rahna

ġham-e-hayāt ko hairat meñ Dālte rahnā

jahāñ talak bhī ho sāġhar uchhālte rahnā

jalī huī haiñ jo sham'eñ udaas palkoñ par

inhī se qarya-e-jāñ ko ujālte rahnā

'adū se rabt baḌhā kar bhī kab ravā Thahrā

ye ham ko vā'da-e-fardā pe Tālte rahnā

abhī to baat karo ham se dostoñ kī tarah

phir iḳhtilāf ke pahlū nikālte rahnā

isī meñ 'ishq kī sehat kā raaz muzmar hai

sadā koī na koī rog pālte rahnā

qatīl ek yahī shaġhl hai pasand hameñ

ḳhayāl-e-yār ko sheroñ meñ Dhālte rahnā

gham-e-hayat ko hairat mein Dalte rahna

jahan talak bhi ho saghar uchhaalte rahna

jali hui hain jo sham'en udas palkon par

inhi se qarya-e-jaan ko ujalte rahna

'adu se rabt baDha kar bhi kab rawa Thahra

ye hum ko wa'da-e-farda pe Talte rahna

abhi to baat karo hum se doston ki tarah

phir iKHtilaf ke pahlu nikalte rahna

isi mein 'ishq ki sehat ka raaz muzmar hai

sada koi na koi rog palte rahna

qatil ek yahi shaghl hai pasand hamein

KHayal-e-yar ko sheron mein Dhaalte rahna