gham-e-hayat mein gham tera Dhal na jae kahin

ġham-e-hayāt meñ ġham terā Dhal na jaa.e kahīñ

tirā ḳhayāl bhī dil se nikal na jaa.e kahīñ

hañsī hañsī meñ tirā vaar chal na jaa.e kahīñ

ye dil jo Duub chalā hai sañbhal na jaa.e kahīñ

tirī nazar ke tasarruf meñ gar zamāna hai

ye sochtā huuñ zamāna badal na jaa.e kahīñ

idhar bhī ek nazar ho ki vaqt kī raftār

tire ḳhayāl se aage nikal na jaa.e kahīñ

shab-e-firāq kā dhaḌkā thā jab na aa.ī thī

ab aa ga.ī hai to Dar hai ki Tal na jaa.e kahīñ

nigāh-e-mast kī sāqī-garī badalne tak

mizāj-e-bāda-kashāñ hī badal na jaa.e kahīñ

bahut dinoñ se bahut mehrbāñ hai vo mujh par

fusūn-e-gardish-e-ayyām chal na jaa.e kahīñ

maiñ kyā karūñgā shab-e-ġham agar vo yaad aa.e

mizha pe koī sitāra machal na jaa.e kahīñ

'sirāj' yaad dilāo na us kī bātoñ ko

bujhā charāġh phir ik baar jal na jaa.e kahīñ

gham-e-hayat mein gham tera Dhal na jae kahin

tera KHayal bhi dil se nikal na jae kahin

hansi hansi mein tera war chal na jae kahin

ye dil jo Dub chala hai sanbhal na jae kahin

teri nazar ke tasarruf mein gar zamana hai

ye sochta hun zamana badal na jae kahin

idhar bhi ek nazar ho ki waqt ki raftar

tere KHayal se aage nikal na jae kahin

shab-e-firaq ka dhaDka tha jab na aai thi

ab aa gai hai to Dar hai ki Tal na jae kahin

nigah-e-mast ki saqi-gari badalne tak

mizaj-e-baada-kashan hi badal na jae kahin

bahut dinon se bahut mehrban hai wo mujh par

fusun-e-gardish-e-ayyam chal na jae kahin

main kya karunga shab-e-gham agar wo yaad aae

mizha pe koi sitara machal na jae kahin

'siraj' yaad dilao na us ki baaton ko

bujha charagh phir ek bar jal na jae kahin