غم پیہم کی زندگی بھی ملی

غم پیہم کی زندگی بھی ملی

غم میں اک لذت‌‌ خفی بھی ملی

عمر نوحہ کناں رہی ساری

اسی نوحے میں نغمگی بھی ملی

غرفشیں شورشیں گہار دہاڑ

اسی جنگل میں سمفنی بھی ملی

گھپ اندھیروں کی رہ گزاروں میں

کبھی چھن چھن کے چاندنی بھی ملی

اک نہ اک راستہ تو سب کا ہے

یہ نہ پوچھو کہ راستی بھی ملی

یوں بھی کیا کم تھے رہزنان حواس

راہ میں بیسویں صدی بھی ملی

اس اندھیرے کا شکریہ جس میں

ہم جو ڈوبے تو روشنی بھی ملی

ہم نے مانگی شگفتگی پائی

بے طلب پھر فسردگی بھی ملی

عمر بھر قسط قسط مرتے رہے

مر چکے جب تو زندگی بھی ملی