gham hon kitne hi magar lab pe tabassum rakhiye

ġham hoñ kitne hī magar lab pe tabassum rakhiye

zindagī ḳhud hai ġhazal is meñ tarannum rakhiye

hāl-e-dil ḳhud hī kahā jaa.e to kyā baat rahī

rah ke ḳhāmosh bhī andāz-e-takallum rakhiye

bazm-e-hairat hai jahāñ dekhiye raunaq us kī

misl-e-ā.īna magar chehre ko gum-sum rakhiye

bazm-e-rindāñ meñ bhī ādāb raheñ pesh-e-nazar

sāmne shauq se phir jaam hī kyā ḳhum rakhiye

fikr-o-ehsās kī duurī se bikhartā hai vujūd

qalb aur zehn meñ kyoñ koī tasādum rakhiye

zindagī kāvish-e-paiham ke sivā kuchh bhī nahīñ

ho ke ġharqāb bhī maujoñ meñ talātum rakhiye

kījiye dasht-navardī to 'ibādat kī tarah

ḳhāk-paimā haiñ to ehsās-e-tayammum rakhiye

ruḳh pe ubhre na shikan mauj-e-havādis se kabhī

dil kī gahrā.ī meñ bhī vus'at-e-qulzum rakhiye

TuuTe jab shīsha-e-dil aa.e na bāhar āvāz

guuñj meñ naġhma-e-mahfil kī use ġham rakhiye

gham hon kitne hi magar lab pe tabassum rakhiye

zindagi KHud hai ghazal is mein tarannum rakhiye

haal-e-dil KHud hi kaha jae to kya baat rahi

rah ke KHamosh bhi andaz-e-takallum rakhiye

bazm-e-hairat hai jahan dekhiye raunaq us ki

misl-e-aina magar chehre ko gum-sum rakhiye

bazm-e-rindan mein bhi aadab rahen pesh-e-nazar

samne shauq se phir jam hi kya KHum rakhiye

fikr-o-ehsas ki duri se bikharta hai wujud

qalb aur zehn mein kyon koi tasadum rakhiye

zindagi kawish-e-paiham ke siwa kuchh bhi nahin

ho ke gharqab bhi maujon mein talatum rakhiye

kijiye dasht-nawardi to 'ibaadat ki tarah

KHak-paima hain to ehsas-e-tayammum rakhiye

ruKH pe ubhre na shikan mauj-e-hawadis se kabhi

dil ki gahrai mein bhi wus'at-e-qulzum rakhiye

TuTe jab shisha-e-dil aae na bahar aawaz

gunj mein naghma-e-mahfil ki use gham rakhiye