gham ka pahaD mom ke jaise pighal gaya

ġham kā pahāḌ mom ke jaise pighal gayā

ik aag le ke ashkoñ kī sūrat nikal gayā

ḳhush-fahmiyoñ ko soch ke maiñ bhī machal gayā

jaise khilaunā dekh ke bachcha bahal gayā

kal tak to kheltā thā vo sho.aloñ se aag se

nā jaane aaj kaise vo paanī se jal gayā

jhulse badan ko dekh ke katrā rahā hai vo

jis ke maiñ ghar kī aag bujhāne meñ jal gayā

bārish huī ġhamoñ kī to āñkhoñ kī siip meñ

aañsū kā qatra palkoñ se girte sambhal gayā

vaise sabhī to ziist se dāman bachā liye

vo kaun hai jo maut se bach kar nikal gayā

taqdīr so na jaa.e kahīñ jāgiye zarā

dekho taraqqiyoñ kā bhī sūraj nikal gayā

gar ho sake to aap bhī badlo miyāñ 'nisār'

kahnā paḌe na ye ki zamāna badal gayā

gham ka pahaD mom ke jaise pighal gaya

ek aag le ke ashkon ki surat nikal gaya

KHush-fahmiyon ko soch ke main bhi machal gaya

jaise khilauna dekh ke bachcha bahal gaya

kal tak to khelta tha wo shoalon se aag se

na jaane aaj kaise wo pani se jal gaya

jhulse badan ko dekh ke katra raha hai wo

jis ke main ghar ki aag bujhane mein jal gaya

barish hui ghamon ki to aankhon ki sip mein

aansu ka qatra palkon se girte sambhal gaya

waise sabhi to zist se daman bacha liye

wo kaun hai jo maut se bach kar nikal gaya

taqdir so na jae kahin jagiye zara

dekho taraqqiyon ka bhi suraj nikal gaya

gar ho sake to aap bhi badlo miyan 'nisar'

kahna paDe na ye ki zamana badal gaya