gham ko ghazlon mein saja kar husn paida kar liya

ġham ko ġhazloñ meñ sajā kar husn paidā kar liyā

maiñ ne apne dard kā bhī ik tamāsha kar liyā

maiñ ne bhī maiñ Thiik huuñ kah kar nigāheñ pher liiñ

tū ne bhī is jhuuT par rasman bharosa kar liyā

justujū terī thī phir kyā dhuup kaisī tishnagī

vus.at-e-sahrā meñ in āñkhoñ ko dariyā kar liyā

ik ta'alluq yaad kā bachtā hai jis par bas nahīñ

baaqī jaisā tū ne chāhā maiñ ne vaisā kar liyā

kitnī hī be-ḳhvāb rāteñ bad-havāsī shā.erī

ḳhud ko terī yaad meñ 'jaun-eliyā' sā kar liyā

mutrib-e-sāz-e-shikasta shā.ir-e-āshufta-sar

ik tirī furqat meñ maiñ ne ḳhud ko kyā kyā kar liyā

gham ko ghazlon mein saja kar husn paida kar liya

main ne apne dard ka bhi ek tamasha kar liya

main ne bhi main Thik hun kah kar nigahen pher lin

tu ne bhi is jhuT par rasman bharosa kar liya

justuju teri thi phir kya dhup kaisi tishnagi

wusat-e-sahra mein in aankhon ko dariya kar liya

ek ta'alluq yaad ka bachta hai jis par bas nahin

baqi jaisa tu ne chaha main ne waisa kar liya

kitni hi be-KHwab raaten bad-hawasi shaeri

KHud ko teri yaad mein 'jaun-eliya' sa kar liya

mutrib-e-saz-e-shikasta shair-e-ashufta-sar

ek teri furqat mein main ne KHud ko kya kya kar liya