غم کو غزلوں میں سجا کر حسن پیدا کر لیا

غم کو غزلوں میں سجا کر حسن پیدا کر لیا

میں نے اپنے درد کا بھی اک تماشہ کر لیا

میں نے بھی میں ٹھیک ہوں کہہ کر نگاہیں پھیر لیں

تو نے بھی اس جھوٹ پر رسماً بھروسہ کر لیا

جستجو تیری تھی پھر کیا دھوپ کیسی تشنگی

وسعت صحرا میں ان آنکھوں کو دریا کر لیا

اک تعلق یاد کا بچتا ہے جس پر بس نہیں

باقی جیسا تو نے چاہا میں نے ویسا کر لیا

کتنی ہی بے خواب راتیں بد حواسی شاعری

خود کو تیری یاد میں جون ایلیاؔ سا کر لیا

مطرب ساز شکستہ شاعر آشفتہ سر

اک تری فرقت میں میں نے خود کو کیا کیا کر لیا