غرض نہیں مجھے اس سے کہ کیا دیا تو نے

غرض نہیں مجھے اس سے کہ کیا دیا تو نے

ہزار‌ شکر کہ جو کچھ دیا دیا تو نے

خیال خدمت خلق خدا دیا تو نے

مجھے حیات کا مقصد بتا دیا تو نے

بشر یہ کچھ نہ کیا شر بڑھا دیا تو نے

جدا جو دیر سے کعبہ بنا دیا تو نے

دوئی کا دل سے جو پردہ اٹھا دیا تو نے

حرم کا دیر کا جھگڑا مٹا دیا تو نے

نجات پائی تھی مر مر کے قید ہستی سے

کہ پھر حیات کا نقشہ جما دیا تو نے

کبھی تھیں آنکھیں تو آیا نظر نہ تو مجھ کو

ہوئیں جو بند تو جلوہ دکھا دیا تو نے

نہیں ہوس مجھے دنیا کی جاہ و حشمت کی

بہت دیا دل درد آشنا دیا تو نے

جہاں میں آنے سے پہلے تھا واقف اسرار

جہاں میں آتے ہی سب کچھ بھلا دیا تو نے

جنہیں یقین ہے دنیا کی بے ثباتی کا

انہیں عذاب گراں سے بچا دیا تو نے

کہاں تھا ہوش مجھے پی کے بادۂ ہستی

اجل باہوش کہا اور جگا دیا تو نے

جو دل کے جان خریدار تھا گوشۂ تربت

اسے بھی گردش دوراں مٹا دیا تو نے

مرے سوا تیرے جلوؤں کو کوئی کیا جانے

تحیرات کا عالم دکھا دیا تو نے

وفور نور سے وحدت کے بزم کثرت میں

ہر ایک ذرہ میں جلوہ دکھا دیا تو نے

وہ فرق اپنے پرائے میں کچھ نہیں کرتے

دلوں سے جن کے من و تو مٹا دیا تو نے

بہار بے خودی ممنون ہے ترا صوفیؔ

سکون قلب کا عالم دکھا دیا تو نے