گرد گماں ہوائے یقیں بیٹھنے لگی

گرد گماں ہوائے یقیں بیٹھنے لگی

بیٹھے نہ آسماں کہ زمیں بیٹھنے لگی

سر یوں اٹھا رہی ہے تمنائے کوئے یار

پھر آرزوئے خلد بریں بیٹھنے لگی

ہم بے مکاں ہوئے کہ ہمارے مکان میں

اب بے گھری ہی بن کے مکیں بیٹھنے لگی

ایسا نہیں کہ شک ہے مجھے اس کے آنے میں

لیکن یہ کیا کہ نبض یقیں بیٹھنے لگی

طوفان تھم گیا تو رکی ذرے کی اڑان

تھی جس جگہ کی خاک وہیں بیٹھنے لگی

حالانکہ وہ کھڑا ہے اسی پر جما کے پاؤں

پھر کیا کیا فلک نے زمیں بیٹھنے لگی

اے بدرؔ تیرے شعر کا لہجہ ہے دل نشیں

ہر بات میرے دل میں کہیں بیٹھنے لگی