gardish-e-chashm hai paimāne meñ
tum ga.e ho kabhī maiḳhāne meñ
ek jalva sā nazar aatā hai
koī to hai mire ġham-ḳhāne meñ
yuuñ hai siine meñ dil-e-pur-hasrat
qabr jaise kisī vīrāne meñ
sāz-e-nairañg hai merī zanjīr
na.ī āvāz hai har daane meñ
dekh ai dil na mujhe chhoḌ ke jā
farq aa jā.egā yārāne meñ
jal ke āshiq hue ma.ashūq sifat
sham.a kā soz hai parvāne meñ
jaan us but meñ lagī rahtī hai
apne ko paate haiñ begāne meñ
be-ḳhudī ne na kahīñ kā rakkhā
ham haiñ bastī meñ na vīrāne meñ
sañg-e-dar tak tire jab sar pahuñchā
laakh sajde kiye shukrāne meñ
nahīñ ma.alūm gayā kis jānib
dil lagā hai tire dīvāne meñ
qissa-e-hazrat-e-yūsuf na suno
turfa ibrat hai is afsāne meñ
hāl-pursī nahīñ kartā koī
bekasī hai mire ġham-ḳhāne meñ
is tarah dil meñ hai aahoñ kā dhuāñ
jaise ḳhaak uḌtī hai vīrāne meñ
barakat kis ke qadam kī hai 'rashīd'
ki azaañ hotī hai but-ḳhāne meñ
gardish-e-chashm hai paimane mein
tum gae ho kabhi maiKHane mein
ek jalwa sa nazar aata hai
koi to hai mere gham-KHane mein
yun hai sine mein dil-e-pur-hasrat
qabr jaise kisi virane mein
saz-e-nairang hai meri zanjir
nai aawaz hai har dane mein
dekh ai dil na mujhe chhoD ke ja
farq aa jaega yarane mein
jal ke aashiq hue mashuq sifat
shama ka soz hai parwane mein
jaan us but mein lagi rahti hai
apne ko pate hain begane mein
be-KHudi ne na kahin ka rakkha
hum hain basti mein na virane mein
sang-e-dar tak tere jab sar pahuncha
lakh sajde kiye shukrane mein
nahin malum gaya kis jaanib
dil laga hai tere diwane mein
qissa-e-hazrat-e-yusuf na suno
turfa ibrat hai is afsane mein
haal-pursi nahin karta koi
bekasi hai mere gham-KHane mein
is tarah dil mein hai aahon ka dhuan
jaise KHak uDti hai virane mein
barakat kis ke qadam ki hai 'rashid'
ki azan hoti hai but-KHane mein
Source:
Gulistan-e-Rasheed (Pg. ghazal-49 page-54)
-
Author:
Piyare Sahab Rasheed
-
- Year of Publication: 1952
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.