garm raftār hai terī ye patā dete haiñ
dam-ba-dam lau tire naqsh-e-kaf-e-pā dete haiñ
hijr se karte haiñ nāshād hameñ vasl se shaad
ḳhud maraz dete haiñ aur aap shifā dete haiñ
dil kī tum baat samajhte ho zabāñ go na hile
ḳhuub sunte ho jo chupke se sadā dete haiñ
kam na samjheñ mirī aahoñ ke sharāroñ ko huzūr
aag abhī saare zamāne meñ lagā dete haiñ
tum ne ehsān kiyā hai ki namak chhiḌkā hai
ab mujhe zaḳhm-e-jigar aur mazā dete haiñ
un kī taqdīr meñ hai mere lahū meñ bharnā
ḳhuun kī bū tire dāmān-e-qabā dete haiñ
saaf karte haiñ abhī ġhair ye vo teġh-e-adā
dost aa ke mujhe paiġhām-e-qazā dete haiñ
jaago ai mumlikat-e-ishq ke sone vaalo
shab ko darbān-ए-dar-e-yār sadā dete haiñ
jitne shā.ir haiñ unhoñ ne hameñ izzat dī hai
ham 'rashīd' un ko shab-o-roz duā dete haiñ
garm raftar hai teri ye pata dete hain
dam-ba-dam lau tere naqsh-e-kaf-e-pa dete hain
hijr se karte hain nashad hamein wasl se shad
KHud maraz dete hain aur aap shifa dete hain
dil ki tum baat samajhte ho zaban go na hile
KHub sunte ho jo chupke se sada dete hain
kam na samjhen meri aahon ke shararon ko huzur
aag abhi sare zamane mein laga dete hain
tum ne ehsan kiya hai ki namak chhiDka hai
ab mujhe zaKHm-e-jigar aur maza dete hain
un ki taqdir mein hai mere lahu mein bharna
KHun ki bu tere daman-e-qaba dete hain
saf karte hain abhi ghair ye wo tegh-e-ada
dost aa ke mujhe paigham-e-qaza dete hain
jago ai mumlikat-e-ishq ke sone walo
shab ko darban-ए-dar-e-yar sada dete hain
jitne shair hain unhon ne hamein izzat di hai
hum 'rashid' un ko shab-o-roz dua dete hain
Source:
Gulistan-e-Rasheed (Pg. ghazal-48 page-54)
-
Author:
Piyare Sahab Rasheed
-
- Year of Publication: 1952
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.