garmi-e-pahlu-e-dildar ne sone na diya

garmi-e-pahlū-e-dildār ne sone na diyā

mujh ko rangīni-e-afkār ne sone na diyā

yūñhī taktā rahā tāroñ ko sahar hone tak

raat bhar dīda-e-bedār ne sone na diyā

raat bhar lazzat-e-qurbat se rahā mahv-e-kalām

raat bhar mujh ko mire yaar ne sone na diyā

raat bhar jaagā kiye palkeñ na jhapkīñ ham ne

raat bhar ishq ke āzār ne sone na diyā

raat bhar dil ke dhaḌakne kī sadā aatī rahī

raat bhar sāya-e-dīvār ne sone na diyā

raat bhar yād-e-guzishta ne satāyā mujh ko

raat bhar chashm-e-guhar-bār ne sone na diyā

raat bhar khul na sakā mujh pe kisī taur 'nadīm'

raat bhar husn-e-pur-asrār ne sone na diyā

garmi-e-pahlu-e-dildar ne sone na diya

mujh ko rangini-e-afkar ne sone na diya

yunhi takta raha taron ko sahar hone tak

raat bhar dida-e-bedar ne sone na diya

raat bhar lazzat-e-qurbat se raha mahw-e-kalam

raat bhar mujh ko mere yar ne sone na diya

raat bhar jaga kiye palken na jhapkin hum ne

raat bhar ishq ke aazar ne sone na diya

raat bhar dil ke dhaDakne ki sada aati rahi

raat bhar saya-e-diwar ne sone na diya

raat bhar yaad-e-guzishta ne sataya mujh ko

raat bhar chashm-e-guhar-bar ne sone na diya

raat bhar khul na saka mujh pe kisi taur 'nadim'

raat bhar husn-e-pur-asrar ne sone na diya