ghazab hai dekhne mein achchhi surat aa hi jati hai

ġhazab hai dekhne meñ achchhī sūrat aa hī jaatī hai

nahīñ roke se dil ruktā tabī.at aa hī jaatī hai

bharā hai dil hamārā dostoñ kī bevafā.ī se

kahāñ tak zabt bātoñ meñ shikāyat aa hī jaatī hai

paḌegā tere jī meñ shak na sun ġhammāz kī bāteñ

hazār ā.īna ho dil par kudūrat aa hī jaatī hai

ye kyā ma.alūm thā ye ishq saudā.ī bānegā

kahīñ Taltī hai aane vaalī aafat aa hī jaatī hai

tilā.ī rañg par kyuuñ kar na un logoñ ko ġharrā ho

ye zar vo chehra hai ḳhātir meñ naḳhvat aa hī jaatī hai

junūn-e-ishq meñ har chand kuchh ġhairat nahīñ lekin

jo koī taan kartā hai hamīyat aa hī jaatī hai

ajab rūdād hai apnī bayāñ karte haiñ ham jis se

nikal aate haiñ aañsū us ko riqqat aa hī jaatī hai

nikal jaa.e na kyuuñ kar shahr se majnūñ bayābāñ ko

bashar ko apnī uryānī se ġhairat aa hī jaatī hai

hañsī achchhī nahīñ dekho tamīz is meñ nahīñ rahtī

ki muñh lag chalne meñ bose kī naubat aa hī jaatī hai

lachakte hī kamar zulf-e-rasā kī jhoñk lene se

asar ma.ashūq-pan kā hai nazākat aa hī jaatī hai

bahut apne ko shā.ista vo ġhairoñ meñ banāte haiñ

tabī.at meñ jo garmī hai sharārat aa hī jaatī hai

kahāñ tak nek sohbat kā asar hogā na insāñ ko

mile tāñbā jo sone se to rañgat aa hī jaatī hai

ḳhudā sūrat na dikhlā.e mujhe ātish-izāroñ kī

hazār un se hai dil ThanDā harārat aa hī jaatī hai

duā-e-maġhfirat jab māñgte haiñ us se ro ro kar

barābar josh meñ ḳhāliq kī rahmat aa hī jaatī hai

koī mahbūb us kī jaan kā saa.il jo hotā hai

jhukā letā hai 'bahr' āñkheñ muravvat aa hī jaatī hai

ghazab hai dekhne mein achchhi surat aa hi jati hai

nahin roke se dil rukta tabiat aa hi jati hai

bhara hai dil hamara doston ki bewafai se

kahan tak zabt baaton mein shikayat aa hi jati hai

paDega tere ji mein shak na sun ghammaz ki baaten

hazar aaina ho dil par kudurat aa hi jati hai

ye kya malum tha ye ishq saudai banega

kahin Talti hai aane wali aafat aa hi jati hai

tilai rang par kyun kar na un logon ko gharra ho

ye zar wo chehra hai KHatir mein naKHwat aa hi jati hai

junun-e-ishq mein har chand kuchh ghairat nahin lekin

jo koi tan karta hai hamiyat aa hi jati hai

ajab rudad hai apni bayan karte hain hum jis se

nikal aate hain aansu us ko riqqat aa hi jati hai

nikal jae na kyun kar shahr se majnun bayaban ko

bashar ko apni uryani se ghairat aa hi jati hai

hansi achchhi nahin dekho tamiz is mein nahin rahti

ki munh lag chalne mein bose ki naubat aa hi jati hai

lachakte hi kamar zulf-e-rasa ki jhonk lene se

asar mashuq-pan ka hai nazakat aa hi jati hai

bahut apne ko shaista wo ghairon mein banate hain

tabiat mein jo garmi hai shararat aa hi jati hai

kahan tak nek sohbat ka asar hoga na insan ko

mile tanba jo sone se to rangat aa hi jati hai

KHuda surat na dikhlae mujhe aatish-izaron ki

hazar un se hai dil ThanDa hararat aa hi jati hai

dua-e-maghfirat jab mangte hain us se ro ro kar

barabar josh mein KHaliq ki rahmat aa hi jati hai

koi mahbub us ki jaan ka sail jo hota hai

jhuka leta hai 'bahr' aankhen murawwat aa hi jati hai