ghazal ke rup mein hum aaj zaKHm-e-dil dikhate hain

ġhazal ke ruup meñ ham aaj zaḳhm-e-dil dikhāte haiñ

na samjho āp-bītī tum ko jag-bītī sunāte haiñ

nahīñ ho tum to suunī suunī sī lagtī hai ye duniyā

chale aao tumhārī raah meñ palkeñ bichhāte haiñ

tumheñ is kā pata shāyad nahīñ hogā ki ham aksar

tumhārī yaad ko apne jigar kā ḳhuuñ pilāte haiñ

hamārī be-ḳhudī dekho ki jab bhī shaam Dhaltī hai

tumhāre naam kā rozāna ham dīpak jalāte haiñ

tumhāre paañv jis ḳhāshāk par paḌte haiñ ai hamdam

usī ḳhāshāk ko ham aañkh kā surma banāte haiñ

hamāre dil pe jo guzrī jo TuuTā koh-e-ġham ham par

ba-uslūb-e-ġhazal rūdād vo tum ko sunāte haiñ

nasīm-e-sub.h ye rangīñ fazā pur-kaif ye manzar

mubārak ho tumheñ sab ham to shām-e-ġham manāte haiñ

qayāmat tak hamāre she'r tum ko zinda rakkheñge

kisī ke saath ham rishta kuchh is sūrat nibhāte haiñ

ghazal ke rup mein hum aaj zaKHm-e-dil dikhate hain

na samjho aap-biti tum ko jag-biti sunate hain

nahin ho tum to suni suni si lagti hai ye duniya

chale aao tumhaari rah mein palken bichhate hain

tumhein is ka pata shayad nahin hoga ki hum aksar

tumhaari yaad ko apne jigar ka KHun pilate hain

hamari be-KHudi dekho ki jab bhi sham Dhalti hai

tumhaare nam ka rozana hum dipak jalate hain

tumhaare panw jis KHashak par paDte hain ai hamdam

usi KHashak ko hum aankh ka surma banate hain

hamare dil pe jo guzri jo TuTa koh-e-gham hum par

ba-uslub-e-ghazal rudad wo tum ko sunate hain

nasim-e-subh ye rangin faza pur-kaif ye manzar

mubarak ho tumhein sab hum to sham-e-gham manate hain

qayamat tak hamare she'r tum ko zinda rakkhenge

kisi ke sath hum rishta kuchh is surat nibhate hain