ghazal ke shanon pe KHwab-e-hasti ba-chashm-e-pur-nam Thahar gae hain

ġhazal ke shānoñ pe ḳhvāb-e-hastī ba-chashm-e-pur-nam Thahar ga.e haiñ

ye kis ne chheḌī hai tān-e-māzī rabāb-o-sargam Thahar ga.e haiñ

firāq rut meñ akelā manzil kī justujū meñ nikal paḌā huuñ

visāl lamhoñ ke ham-qadam vo qadam damā-dam Thahar ga.e haiñ

abhī to sochā thā terī mahfil meñ ham na ā.eñge ab dobāra

ye kis sadā kā gumāñ huā hai ki yak-ba-yak ham Thahar ga.e haiñ

vo saath jab tak rahe hamāre bahār apne shabāb par thī

vo kyā ga.e ki dil-o-nazar meñ udaas mausam Thahar ga.e haiñ

mohabbatoñ ke safīr ham haiñ judā hai tarz-e-safar hamārā

jahāñ bhī zikr-e-vafā milā hai vahāñ pe paiham Thahar ga.e haiñ

ajal kī kirnoñ se ham kisī pal bhī ḳhushk hone ke muntazir haiñ

bahut ġhanīmat hai chand lamhe jo misl-e-shabnam Thahar ga.e haiñ

prem-agnī meñ jhulse nainā ye pūchh baiThe haiñ aaj phir se

ki barkhā rut meñ sakhī batā tū kahāñ pe bālam Thahar ga.e haiñ

jahāñ pe kal tak thī chhāñv 'zākir' vahīñ pe Thahrī hai dhuup ab ke

ajab sitam hai kahīñ pe aa kar kahīñ ke mausam Thahar ga.e haiñ

ghazal ke shanon pe KHwab-e-hasti ba-chashm-e-pur-nam Thahar gae hain

ye kis ne chheDi hai tan-e-mazi rabab-o-sargam Thahar gae hain

firaq rut mein akela manzil ki justuju mein nikal paDa hun

visal lamhon ke ham-qadam wo qadam dama-dam Thahar gae hain

abhi to socha tha teri mahfil mein hum na aaenge ab dobara

ye kis sada ka guman hua hai ki yak-ba-yak hum Thahar gae hain

wo sath jab tak rahe hamare bahaar apne shabab par thi

wo kya gae ki dil-o-nazar mein udas mausam Thahar gae hain

mohabbaton ke safir hum hain juda hai tarz-e-safar hamara

jahan bhi zikr-e-wafa mila hai wahan pe paiham Thahar gae hain

ajal ki kirnon se hum kisi pal bhi KHushk hone ke muntazir hain

bahut ghanimat hai chand lamhe jo misl-e-shabnam Thahar gae hain

prem-agni mein jhulse naina ye puchh baiThe hain aaj phir se

ki barkha rut mein sakhi bata tu kahan pe baalam Thahar gae hain

jahan pe kal tak thi chhanw 'zakir' wahin pe Thahri hai dhup ab ke

ajab sitam hai kahin pe aa kar kahin ke mausam Thahar gae hain