گھر عطا کر مکاں سے کیا حاصل

گھر عطا کر مکاں سے کیا حاصل

صرف وہم و گماں سے کیا حاصل

بے یقینی ہی بے یقینی ہے

اس زمین و زماں سے کیا حاصل

سوچ آگے بڑھے تو بات بنے

صرف عمر رواں سے کیا حاصل

دل بھی آسودہ چاہیے ورنہ

دولت بیکراں سے کیا حاصل

ایک چہرہ ہے کائنات مری

صورت دیگراں سے کیا حاصل

جب خوشی روح کی نہ ساتھ رہی

راحت جسم و جاں سے کیا حاصل

دل میں جب جنس آرزو ہی نہیں

صرف خالی دکاں سے کیا حاصل

اپنے اعمال کو بھی بدلو عدیلؔ

صرف آہ و فغاں سے کیا حاصل