ghar se main dasht ki virani alag rakhta hun

ghar se maiñ dasht kī vīrānī alag rakhtā huuñ

kaam mushkil hai ba-āsānī alag rakhtā huuñ

tab mirī zaat meñ kuchh bhī nahīñ hotā hai numū

apnī is ḳhaak se jab paanī alag rakhtā huuñ

ek jaise nahīñ hote haiñ yahāñ do manzar

sub.h se shaam kī hairānī alag rakhtā huuñ

hai qabā terī alag merī qabā se jaise

terī 'uryānī se 'uryānī alag rakhtā huuñ

mujh ko hotī hai talab sirf tire bose kī

dūsre hoñThoñ se peshānī alag rakhtā huuñ

merī sultānī to duniyā tire hī jaisī thī

haañ magar be-sar-o-sāmānī alag rakhtā huuñ

yūñhī dastak nahīñ detī mire dar par tā'bīr

ḳhvāb kī tum se nigahbānī alag rakhtā huuñ

jism kī tīrgī hai vo hī zamāne vaalī

maiñ to bas ruuh kī tābānī alag rakhtā huuñ

muḳhtalif haiñ mirī ḳhushiyāñ bhī kisī se 'āzar'

ye bhī sach hai ki pareshānī alag rakhtā huuñ

ghar se main dasht ki virani alag rakhta hun

kaam mushkil hai ba-asani alag rakhta hun

tab meri zat mein kuchh bhi nahin hota hai numu

apni is KHak se jab pani alag rakhta hun

ek jaise nahin hote hain yahan do manzar

subh se sham ki hairani alag rakhta hun

hai qaba teri alag meri qaba se jaise

teri 'uryani se 'uryani alag rakhta hun

mujh ko hoti hai talab sirf tere bose ki

dusre honThon se peshani alag rakhta hun

meri sultani to duniya tere hi jaisi thi

han magar be-sar-o-samani alag rakhta hun

yunhi dastak nahin deti mere dar par ta'bir

KHwab ki tum se nigahbani alag rakhta hun

jism ki tirgi hai wo hi zamane wali

main to bas ruh ki tabani alag rakhta hun

muKHtalif hain meri KHushiyan bhi kisi se 'azar'

ye bhi sach hai ki pareshani alag rakhta hun